家己的查某囝鞏金的,
別人的就是歹銅舊錫?
灶跤就是戰場,
查某人的記持、權力、關係攏佇遮捙拚,
一代過一代,為著地位咧相爭人生的輸贏……
攑鋤頭的庄跤姑娘,嫁入奢颺派頭的地方大口灶。表面上是世俗人欣羨的好姻親,想袂到毋捌世事的戀愛茈鳥仔,愛著「老嬰」毋知死活,毋但為愛拖磨,閣著面對女王大家的權威。青春少女開始做人家後、新婦、弟婦仔、阿嫂……無仝的身份,無仝的挑戰,伊敢接載會牢?世代之間的思想觀念、雙方家族的權勢,懸低坎是天差地,萬項衝突交纏的惡網,拍結毬的身命,敢有機會通好敨放?
林榮淑頭一部性別小說,𤆬咱行入1970年代台灣社會,深入描寫查某人對青春戀愛到扞灶扞家的成長疼。從一个新婦嫁入大家族的日常照見彼時女性的處境、家庭倫理佮文化。受傳統觀念束縛之下的女性,按怎佇衝突佮責任之間,尋著家己的力量。



