棒球佇台灣毋但是一項運動，猶閣是重要的文化記持。
由用上好聽的台語轉播棒球——黃國洲先生，來教逐家按怎看棒球，予參加的家庭成員，會當迒過戶橂，入來上熱血的台灣棒球世界，對一日球迷慢慢仔變成一世人的球癡，棒球就是有滿滿的力量，有才調面對未來所有的難關。
你敢有發現台灣一陣仔過，就會出現「一日球迷」的現象，職業棒球愈來愈發展，各種出版品、啦啦隊，甚至有bàng-gà、票房強強滾的電影嘛愈來愈時行，到底球迷是咧痟幾點的？
為著予好玄的台灣人了解台灣棒球發展的理路，黃國洲老師佮金牌主持人曾偉旻特別開【台語棒球嘛會通】的課程，用台語捌棒球，閣會了解台灣按怎用棒球連結所有台灣人的心。
- 系列課程日期：5/16、5/23、6/6、6/27、7/4、7/11、8/1、8/22、8/29，閣會揀一工，做伙去球場看球。（採單堂報名，有意願參與後續課程的朋友，要逐堂報名喔）
- 課程時間：拜六透早十點
- 課程地點：佇現流冊店B1
●本活動得著114年文化部台語家庭集點課程及活動補助，台語使用比例是90%以上
◆講師介紹
黃國洲
台語上好的專業棒球球評
雲林北港人，政大政治系畢業。自廟口街球算起，球齡已經超過五十冬。
頂世紀末，開始鑽研棒球理論，曾為棒球雜誌寫過球路專欄，王建民佇大聯盟徛起了後，綴伊投一休四佇報紙寫稿評球。
2009年底，擔任台北市三級棒球基層義務教練（健康國小、介壽國中、麗山高中）。
2019年起，應公視台語台邀請，先任球評後做主播；也無定期佇全國各廣播電台佮電視台擔任特約球評。
◆主持介紹
曾偉旻 阿旻
推廣台語佮運動文化的主持人。
長期佇電視台佮媒體界服務，嘛是公視台語台的棒球、排球主播，用親切自然的台語來放送比賽。
2025年得著國際廣播協會最佳年度主持人的肯定。曾偉旻過去主持《台灣新眼界》、主播國際新聞，內容除了國、內外政經情勢，嘛關心社會議題，展現多元的主持能力。
向望台語運動轉播愈來愈普遍，嘛予本土語言佮運動文化有更加深的結合。
------
◆課程目標：
對一日球迷到初階球迷
用台語進入棒球的世界
用台語看經典棒球作品
用台語看有棒球的鋩角
用台語摃出棒球新宇宙
◆課程規劃：
本系列課程的第一節課，𤆬逐家認捌台灣棒球的發展過程：對棒球是對啥物時陣傳來臺灣？經歷日本時代的推廣，到少年棒球的光榮年代，上尾到職業棒球成立而且延續至今，已經行入第37个年頭。
透過這段歷史，咱會當理解棒球佇台灣社會的特殊意義——伊毋但是一項運動，更加是予咱做伙博感情、展現團隊精神的重要象徵。同時，課程嘛會紹介棒球的基本規則佮進行的方式，予學員會使閣較清楚掌握這項運動的核心精神。
佇認捌棒球的背景了後，課程會推薦幾部佮棒球相關的優秀作品，包括bàng-gà和電影，而且準備實體冊佇現場傳看。遮的作品毋但展現棒球的熱誠佮感動，也反映無仝文化對棒球的看法。透過講師說明推薦，學員會當對文學佮影像作品內底，進一步感受棒球所承接的夢想佮情感。
最後，課程猶有𤆬恁體驗課程：khē-tsi bòo-lù。學員欲按怎來做躑球？欲按怎承著？咱鬥陣來khē-tsi bòo-lù，而且透過空傳、空接的練習來調整姿勢。這毋但是技術上的訓練，閣是體驗棒球精神的過程：規心、合作佮連紲練習。透過親身參與，學員會使閣較深刻理解棒球迷人的所在。
後續每一節課對一个「關鍵詞」落去紹介，透過𠢕人的故事佮藝文作品的介紹，展開閣較深入的探索。課程主題包括：
- 打擊：力量佮技巧的結合，經典打者的故事佮作品中的象徵。
- 投球：知名投手的風格佮精神，影像作品中的投球美學。
- 盜壘：速度佮智慧的展現，bàng-gà和電影中的冒險精神。
- 內野防守：幼路守備佮團隊默契，作品中對信任的展現。
- 外野防守：空間感佮臨場反應的美學，外野手的經典故事。
- 捕手守備：捕手成做球隊的靈魂，作品中對領導佮溝通的描寫。
- 教練：棒球史上重要教練的理念，作品中「引導」佮「啟發」的力量。
- 裁判：比賽中的公平佮判斷，作品中對正義佮規範的思考。
好酒沉甕底，活動的最後就是𤆬領學員親身去棒球場，感受一場精采的比賽現場。實際去看比賽，學員會當將課程所學著的來到現場感受
和現場氛圍結合，體驗觀眾的熱情、球員的拚勢，以及棒球成做文化活動伊迷人的所在。
#台語棒球 #教練 #棒球漫畫通 #專欄作家 #四聲道棒球通
#配合文化部培育台語家庭計畫集點活動 #文化部國家語言整體發展方案支持
