[蠻野講堂] 台語棲地復育系列座談─黃金密婆
台灣這馬有--ê 38種密婆（bit-pô）大部份是殕（phú）色—ê，日時愛踮暗ê所在ê彼種。毋過總是有例外ê，這就是名聲迵四海ê「黃金鼠耳蝠」。伊規身軀攏是金毛，日時會䀣佇厝宅的龍眼葉叢內面，袂輸是會飛的”奇異果”，真得著中南部民眾的疼心！
黃金鼠耳蝠比其他分佈佇印度、尼泊爾佮中國等等指名種ê彼寡密婆加較大隻，是獨立有效ê亞種。伊嘛是頭一種佇台灣hőng號名ê密婆。因為過去這種密婆佇世界上上有代表性ê生育族群就是佇台灣雲林一棟民宅厝樑頂懸。上濟ê時陣有到成千隻。因為伊ê身軀閣金閣媠，所以逐家嘛叫伊是”金密婆”。金密婆熱天會到平地生湠，寒天就到中高海拔ê山空內冬眠。暗時才去無開電火的田地佮水域遐掠蠓蟲來食。
這成20年來ê觀察顯示in的數量當咧減少，原因可能佮棲地破壞、棲樹刜剉、農藥汙染佮光害等有關係。目前金密婆已經列名佇「2017臺灣陸域哺乳類紅皮書名錄」ê「國家易危」等級。密婆佇過去是福氣的象徵（因為蝠佮福仝音），但是這十幾年來煞變作眾人嫌的對象，尤其是佇這擺的武漢肺炎疫情內面hőng汙名化甲真嚴重。到底，密婆敢是有親像主流媒體所講的遐驚人？台灣ê金密婆又閣是為啥物遐呢受到民眾的歡迎？就予咱佇7月16日晚上，來呷米餐廳坐坐咧，聽看雲林ê黃金蝙蝠生態館張恒嘉按怎共咱分享~
【講堂資訊】
講題：黃金密婆
講師：張恒嘉（黃金蝙蝠館 館長）
時間：2020/7/16（四）19:00-21:00
地點：呷米共食廚房三樓（台北市中正區衡陽路9號）
費用：咱這系列ê課程免收費
主辦單位：台灣蠻野心足生態協會
協辦單位：李江却台語文教基金會、台文通訊Bong報、台語正常化推動聯盟
注意事項：
※本講座全程以台語講課
※因為是室內ê講座，請家己喙罨攢予好勢，嘛請規路攏掛咧；主辦單位嘛會攢消毒酒精予逐家使用
